लातूर:   नियतीच्या आघातावर माणसाच्या क्रूरतेची जोड मिळाल्याने अहमदपूर तालुक्यातील गोथळा गावात एक हृदयद्रावक घटना घडली आहे. अल्पभूधारक शेतकरी व्यंकटी सागर कोदळे (रा. गोथळा) यांचे दीड एकरवरील सोयाबीनचे पीक मध्यरात्री अज्ञात व्यक्तीने पेटवून दिल्याने राख झालं.
रात्रीच्या काळोखात पिकाच्या ढिगाला आग लावून संपूर्ण स्वप्न जाळलं गेलं, आणि या घटनेने कोदळे कुटुंब पूर्णपणे उद्ध्वस्त झालं आहे.

कर्ज काढून बटाईची जमीन घेतली, पण सर्व काही जळून खाक .कोदळे यांच्या नावावर फक्त दीड एकर जमीन असून, कुटुंबाचा उदरनिर्वाह भागवण्यासाठी त्यांनी इतर शेतकऱ्यांची सात एकर जमीन बटाईने घेतली होती. त्यासाठी त्यांनी तब्बल दीड लाख रुपये मोबदला दिला आणि मोठ्या खर्चाने साडेआठ एकरांवर सोयाबीन पिकवलं.
मात्र, दिवाळीनंतरच्या मध्यरात्री अज्ञातांनी लावलेल्या आगीत शेतात साठवलेले सात बॅग सोयाबीन पूर्णतः जळून खाक झाले.
“बटाईचे पैसे कसे फेडायचे? घरात अंधार आणि कर्जाचा डोंगर उरलाय,” अशी हृदय पिळवटून टाकणारी प्रतिक्रिया व्यंकटी कोदळे यांनी दिली.

पोलीस पंचनामा सुरू, दोषींना शिक्षा मागणी
या घटनेनंतर व्यंकटी कोदळे यांनी अहमदपूर पोलिसांत तक्रार दाखल केली आहे. बिट अंमलदार चिमनदरे यांनी घटनास्थळी जाऊन पंचनामा केला असून, पोलिसांनी तपास सुरू केला आहे.
गोताळा गावात या घटनेने शोककळा पसरली असून, ग्रामस्थांनी प्रशासनाला त्वरित आर्थिक मदतीची मागणी केली आहे. तसेच या अमानुष प्रकारातील दोषींवर कठोर कारवाई करावी, अशी सर्वसामान्यांची मागणी होत आहे.
अशा घटनांमुळे शेतकऱ्यांची जिद्द मोडते आणि त्यांच्या विश्वासावर पाणी फिरते. शासनाने अशा पीडित शेतकऱ्यांना केवळ सहानुभूती नव्हे, तर त्वरित आर्थिक दिलासा आणि गुन्हेगारांना शिक्षा देण्याची गरज आहे.