-दिल्ली स्फोटाचा तुर्की कनेक्शन! ‘सेशन ॲप’वरून चालत होती संवादयंत्रणा

-हँडलर ‘Ukasa’ अंकारामधून देत होता आदेश जैशशी संबंधाची शंका

-फरिदाबादमध्ये २९०० किलो अमोनियम नायट्रेट जप्त

-स्फोटात डॉ. उमर ठार डीएनए अहवालानंतर ओळख निश्चित

-भारतातील दहशतवादी नेटवर्कचे धागे आता तुर्कीपर्यंत

नवी दिल्ली : राजधानी दिल्लीत सोमवारी (10 नोव्हेंबर) संध्याकाळी झालेल्या कार स्फोटाने देश हादरला आहे. या स्फोटात आत्मघातकी दहशतवादी डॉ. उमर ठार झाला असून, तपासात या स्फोटामागील धक्कादायक ‘तुर्की कनेक्शन’ समोर आले आहे. फरिदाबाद दहशतवादी मॉड्यूलमध्ये अटक झालेल्या डॉक्टर दहशतवाद्यांचा हँडलर दिल्लीपासून हजारो किलोमीटर दूर तुर्कीच्या अंकारा शहरात असल्याची माहिती सूत्रांनी दिली आहे.

‘सेशन ॲप’वरून होत होता संपर्क

पोलिसांच्या प्राथमिक तपासानुसार, उमर आणि त्याचे सहकारी आदिल व मुझम्मिल यांनी त्यांच्या तुर्कीतील हँडलरशी ‘सेशन ॲप’ (Session App) या एन्क्रिप्टेड प्लॅटफॉर्मद्वारे संपर्क साधला होता. या हँडलरचे नाव Ukasa असल्याचे समोर आले आहे. मात्र, तो खरे नाव आहे की कोड नेम, याबाबत अजूनही संशय कायम आहे. सुरक्षा यंत्रणांना हा Ukasa जैश-ए-मोहम्मदशी संबंधित असू शकतो असा संशय आहे.

२९०० किलो अमोनियम नायट्रेटसह अटक

फरिदाबादमध्ये झालेल्या कारवाईत २९०० किलो अमोनियम नायट्रेट जप्त करण्यात आले. जम्मू-कश्मीर आणि हरियाणा पोलिसांच्या संयुक्त छाप्यात या स्फोटकांचा साठा हाती लागला होता. याच दहशतवादी मॉड्यूलमधील सदस्य सोमवारी सकाळी अटकेत आले आणि त्याच दिवशी संध्याकाळी दिल्लीतील लाल किल्ल्याजवळ भीषण स्फोट झाला. या स्फोटात १० जणांचा मृत्यू झाला, तर २० जण जखमी झाले.

तुर्कीत ब्रेनवॉशचा संशय

सुरक्षा एजन्सींच्या माहितीनुसार, मार्च २०२२ मध्ये काही भारतीय युवक तुर्कीला गेले होते. तिथेच त्यांचा ब्रेनवॉश झाला आणि हँडलर्सशी थेट संपर्क आला. डॉ. उमर, आदिल आणि मुझम्मिल हे तुर्कीमध्ये गेले होते आणि अंकारामध्ये त्यांची भेट Ukasa या हँडलरशी झाली होती. त्याने त्यांना निवास आणि प्रवासाची सोय केली असल्याचे तपासात उघड झाले आहे.

मृत दहशतवादी उमरच चालवत होता स्फोटकांनी भरलेली कार

दिल्ली स्फोटात मृत्यू झालेल्या उमरची ओळख डीएनए अहवालानंतर निश्चित झाली आहे. तोच कारमध्ये बसलेला होता आणि स्वतःलाच उडवून दिले होते. त्याच्या मृत्यूने या दहशतवादी मॉड्यूलचा एक भाग संपला असला तरी, ‘तुर्की लिंक’मुळे तपासाचे नवे धागेदोरे मिळाले आहेत.

तपास एजन्सी अलर्ट मोडवर

या घटनेनंतर दिल्ली पोलिस, NIA आणि इतर सुरक्षा संस्था हाय-अलर्टवर आहेत. ‘सेशन ॲप’द्वारे वापरलेले सर्व डिजिटल ट्रेल्स, IP अॅड्रेस आणि क्रिप्टो व्यवहार तपासले जात आहेत. भारतातून कार्यरत असलेल्या या आंतरराष्ट्रीय दहशतवादी नेटवर्कचे धागे तुर्कीपर्यंत पोहोचले असल्याचे आता स्पष्ट झाले आहे.