-खरडलेल्या जमीनींसाठी मोफत माती व गौण खनिजांवर रॉयल्टी माफ”

“अतिवृष्टीत जमीन वाहून गेली? राज्य सरकार देणार मोफत माती, गाळ आणि कंकर – जिल्हाधिकाऱ्यांना तत्काळ आदेश”

एपीएमसी न्यूज नेटवर्क:
राज्यातील अतिवृष्टी आणि पुरामुळे संकटात सापडलेल्या शेतकऱ्यांसाठी राज्य सरकारने मोठा निर्णय घेतला आहे. अतिवृष्टीमुळे खरडलेल्या आणि खड्डे पडलेल्या शेतजमिनी पूर्ववत करण्यासाठी मोफत माती, गाळ, मुरूम आणि कंकर पुरवण्याचा निर्णय महसूल मंत्री यांनी घोषित केला आहे. यासोबतच गौण खनिजांवरील रॉयल्टीही सरकारने माफ केली आहे. या निर्णयाची तात्काळ अंमलबजावणी करण्याचे आदेश सर्व जिल्हाधिकाऱ्यांना देण्यात आले आहेत.

पूरामुळे जमीनींचे प्रचंड नुकसान
राज्यातील अनेक जिल्ह्यांत पुराचा तडाखा तीव्र होता. सोलापूर जिल्ह्यातील सीना नदीला सप्टेंबरमध्ये आलेल्या महापुरात अनेक शेतकऱ्यांची पिके वाहून गेली, तर जमीनींना 10 ते 15 फुटांचे खोल खड्डे पडले. नदीचा प्रवाह बदलल्याने अनेक शेतजमिनी पूर्णपणे उद्ध्वस्त झाल्या. अशीच परिस्थिती राज्यातील इतर भागांमध्येही पाहायला मिळाली.

30 जिल्ह्यांतील शेतकरी कडेलोटात
कृषीमंत्री दत्तात्रय भरणे यांच्या माहितीनुसार, ऑगस्ट–सप्टेंबरमध्ये झालेल्या अतिवृष्टीमुळे राज्यातील तब्बल 30 जिल्हे बाधित झाले. राज्यातील 17,85,714 हेक्टर (सुमारे 42.84 लाख एकर) क्षेत्रातील खरीप पिकांचे मोठे नुकसान नोंदवले गेले आहे. सोयाबीन, कापूस, मका, तूर, उडीद, मूग, भाजीपाला, फळपिके, बाजरी, ज्वारी, कांदा, ऊस आणि हळद या सर्व पिकांना मोठा फटका बसला आहे.

शेतकऱ्यांना पुनर्वसनाचा आधार
पुरामुळे जमीनच वाहून गेल्यामुळे मोठ्या प्रमाणात कृषीक्षेत्र उद्ध्वस्त झाले आहे. या पार्श्वभूमीवर शेतकऱ्यांना पुन्हा उभं करण्यासाठी मोफत माती आणि गाळ देण्याचा निर्णय शेतकऱ्यांसाठी दिलासादायक ठरणार आहे. सरकारचा हा निर्णय तातडीने अमलात आणण्याची प्रक्रिया सुरू करण्यात आली असून, शेतकऱ्यांच्या जमीनी पुनर्स्थापित करण्यास यामुळे मदत होणार आहे.