मुंबई : खरा आयफोन दाखवून डुप्लिकेट आयफोन विकणाऱ्या टोळीला पकडण्यास दिंडोशी पोलिसांना यश आले आहे. ही टोळी मुळची उत्तर प्रदेशातील मेरठ येथील असून, मुंबईत विविध ठिकाणी डुप्लिकेट मोबाईल आयफोन विकायची. तीन महिन्यांच्या अथक प्रयत्नांनंतर अखेर या टोळक्याला जेरबंद करण्यास पोलिसांना यश आले आहे. आदिल अहमद, शमी अहमद, अहमद नवाज समीम अहमद अशी अटक केलेल्या आरोपींची नावे आहेत. पोलिसांनी त्यांच्याकडून रोख डुप्लिकेट आयफोन आणि इतर अनेक वस्तू जप्त केल्या आहेत. सध्या दिंडोशी पोलिसांनी तिन्ही आरोपींना अटक केली असून, पुढील तपास सुरू आहे.

30 हजारात डुप्लिकेट मोबाईल विकायचे

अटक केलेले आरोपी आयफोन खरेदी करण्यास इच्छुक असलेल्या नागरिकांना हेरायचे. त्यांना खरा आयफोन दाखवायचे. मग आपल्याकडील डुप्लिकेट मोबाईल खरे सांगून चॉईस करण्यास सांगायचे. यानंतर ग्राहकाने पसंत केलेला मोबाईल 30 हजार रुपयात त्याला विकायचे. अशाच प्रकारे या आरोपींनी तक्रारदाराला ओबेरॉय मॉलजवळ खरा आयफोन दाखवून 30 हजार रुपयांना डुप्लिकेट आयफोन विकला होता. मात्र हा आयफोन डुप्लिकेट असल्याचे लक्षात येताच सदर व्यक्तीने दिंडोशी पोलीस ठाण्यात धाव घेत फसवणुकीची तक्रार दाखल केली.

तीन दिवस सापळा रचून केली अटक

दिंडोशी पोलीस ठाण्यात तक्रार प्राप्त झाल्यानंतर पोलीस या टोळीचा कसून शोध घेत होती. तब्बल 3 महिन्यांच्या अथक परिश्रमानंतर ही टोळी मुंबईतील नागपाडा परिसरात राहत असल्याची माहिती पोलिसांना मिळाली. त्यानंतर 3 दिवस पोलिसांनी नागपाडा परिसरात सापळा रचून आरोपींना अटक केली. हे आरोपी अशा प्रकारे आंध्र प्रदेश, बेंगळुरूसह देशातील विविध राज्यात लोकांना फसवणूक करत होते. हे सर्व आरोपी मेरठ उत्तर प्रदेशचे रहिवासी आहेत आणि नोएडा येथून डुप्लिकेट आयफोन आणत होते. हे लोक आयटी हब मॉल शॉपिंग सेंटर किंवा हायप्रोफाईल भागात जाऊन लोकांना आयफोन दाखवून डुप्लिकेट आयफोन विकायचे.