-माजी सचिव खंडागळेंच्या हकालपट्टीनंतर संचालक मंडळात अस्वस्थता नवीन सचिव शरद जरे यांच्यावर शिस्तभंग कारवाईचा ठराव

मुंबई :मुंबई कृषी उत्पन्न बाजार समितीच्या संचालक मंडळाच्या ३१ ऑक्टोबर रोजी झालेल्या बैठकीत गदारोळ झाल्याची माहिती समोर आली आहे. या बैठकीत नव नियुक्त सचिव शरद जरे गैरहजर राहिल्याने उपसभापतींसह काही संचालकांनी संताप व्यक्त करत थेट शिस्तभंग कारवाईचा ठराव मंजूर केला असल्याचे समजते.

शरद जरे यांनी सचिवपदाची जबाबदारी स्वीकारून अवघे २४ तास झाले असतानाच, त्या दिवशी ते पुण्यात पणन संचालकांच्या बैठकीसाठी उपस्थित होते. त्यामुळे त्यांनी लेखी स्वरूपात कळवले होते की, बाजार समितीच्या संचालक मंडळाच्या बैठकीस सहसचिव महेश साळुंके पाटील हजर राहतील. तरीही जरे यांच्याविरोधात शिस्तभंग कारवाईचा ठराव मंजूर करण्यात आल्याने अनेक प्रश्न उपस्थित होत आहेत.

बाजार समिती परिसरात आता चर्चेला उधाण आलं आहे .सहसचिव उपस्थित असताना शिस्तभंग कसा? या प्रश्नावरून संचालक मंडळातील निर्णयप्रक्रियेवर गंभीर शंका उपस्थित केल्या जात आहेत.

दरम्यान, काही संचालक मंडळ सदस्यांनी जरे यांच्या विरोधात ‘आम्हाला हे सचिव नकोत, त्यांना परत पाठवा’ अशी मागणी बैठकीत केल्याचेही समजते.
माजी सचिव डॉ. खंडागळे यांची हकालपट्टी झाल्यानंतर, त्यांच्यासोबत कार्य करणाऱ्या काही संचालक आणि अधिकाऱ्यांमध्ये अस्वस्थता निर्माण झाल्याचे सूत्रांचे म्हणणे आहे.

यामुळेच सध्याचे मंडळ ‘आपल्या मर्जीनुसार काम करणारे अधिकारीच हवेत’ अशा भूमिकेत असल्याची चर्चा रंगली आहे.याशिवाय, कार्यकाल संपूनही हेच संचालक मंडळ “खुर्चीवर फेविकॉलसारखं” चिकटलं आहे, अशीही टीका बाजार समिती परिसरात होत आहे.

सगळ्यात महत्त्वाचं म्हणजे, या मंडळाला पणन मंत्री आणि पणन विभागाचा छुपा पाठिंबा असल्याची कुजबुज सुरू आहे.
आणि आता हेच मंडळ राज्य सरकारच्या ‘राष्ट्रीय बाजार’ या महत्त्वाकांक्षी प्रकल्पालाच थेट ओपन चॅलेंज देत असल्याची माहिती समोर येत आहे.

मुंबई APMC मधील या अंतर्गत सत्तासंघर्षाचं पुढचं पाऊल काय असेल,
आणि सचिव शरद जरे यांचं पुढचं उत्तर काय असणार,याकडे आता सगळ्यांचंच लक्ष लागलंय…