-नवीन सचिव शरद जरे यांची पुढाकार रखडलेली फास्टॅग प्रणाली पुन्हा सुरू करण्याची तयारी

नवी मुंबई : मुंबई कृषी उत्पन्न बाजार समिती (APMC) परिसरातील वाढत्या वाहन गर्दीवर नियंत्रण आणण्यासाठी पुन्हा एकदा फास्टॅग प्रणाली लागू करण्याचा विचार सुरू झाला आहे. वाशीतील पाचही बाजारांमध्ये दररोज हजारो वाहनांची वर्दळ असते. अनेक वाहनं माल उतरवल्यानंतरही दीर्घकाळ बाजार आवारात उभी राहतात, त्यामुळे वाहतूक कोंडी निर्माण होते आणि व्यापाऱ्यांच्या व्यवहारावर परिणाम होतो.अशा परिस्थितीत फास्टॅग प्रणाली लागू केल्यास वाहनांच्या आवक-जावकवर नियंत्रण ठेवणे सोपे होईल. निश्चित वेळ ओलांडल्यास वाहनांवर स्वयंचलित दंड आकारता येईल. या माध्यमातून बाजार समितीच्या उत्पन्नात वाढ होईल, असा विश्वास नव्या सचिव शरद जरे यांनी व्यक्त केला आहे.

गेल्या वर्षी तत्कालीन सचिव डॉ. पी. एल. खंडागळे यांनी फास्टॅग प्रणालीचा प्रस्ताव मांडला होता आणि संचालक मंडळाने ठराव सुद्धा केला होता,एका खाजगी बँकेने या संदर्भात प्रेझेंटेशनही दिले होते, मात्र वाहतूकदार संघटनांनी या निर्णयाला विरोध दर्शविल्याने प्रस्ताव रखडला   होता.आता मात्र नवीन सचिव शरद जरे यांनी हा मुद्दा पुन्हा चर्चेत आणला आहे. “एपीएमसीच्या पाचही बाजार आवारात वाढती वाहन गर्दी लक्षात घेता फास्टॅग प्रणाली लागू करणे अत्यावश्यक आहे. यामुळे वाहतूक सुरळीत होईल आणि बाजार समितीच्या उत्पन्नातही वाढ होईल,” असे जरे यांनी सांगितले.

या प्रणालीअंतर्गत प्रत्येक बाजाराच्या प्रवेशद्वारावर टोलनाक्यांप्रमाणे बूम बॅरियर्स आणि फास्टॅग स्कॅनर बसवले जाणार आहेत. वाहनाने निश्चित वेळेत परिसरातून बाहेर न गेल्यास स्वयंचलित दंड आकारला जाईल. या माध्यमातून अनधिकृतपणे उभ्या राहणाऱ्या वाहनांवर नियंत्रण येईल तसेच व्यापारी आणि ग्राहकांना अधिक मोकळा, शिस्तबद्ध परिसर मिळेल.

बाजार समितीत शिस्त आणि पारदर्शकतेवर भर जरे यांची नवी पावले

बाजार समितीचे कामकाज अधिक शिस्तबद्ध आणि पारदर्शक पद्धतीने चालवण्यासाठी प्रयत्न सुरू असल्याची माहिती सचिव शरद जरे यांनी दिली आहे. उत्पन्न वाढीसाठी आवश्यक असलेली नवीन धोरणं आणि प्रणालींना टप्प्याटप्प्याने लागू करण्यात येणार असल्याचेही त्यांनी सांगितले.

पदभार स्वीकारताच जरे यांनी सर्वप्रथम मुख्यालयातून शिस्त प्रस्थापित करण्यास सुरूवात केली आहे. एपीएमसी परिसरातील सर्व प्रवेशद्वार बंद करून एकाच ठिकाणावरून ये-जा करण्याची व्यवस्था करण्यात आली आहे. प्रत्येक येणाऱ्या व्यक्तीचे नाव व माहिती नोंदविण्यासाठी नोंदणी रजिस्टर सुरू करण्यात आले आहे.तसेच, बाजारातील अडचणी आणि तक्रारी त्वरित सोडवण्यासाठी आता व्हिडिओ कॉन्फरन्सिंग (VC) च्या माध्यमातून उपसचिव आणि संबंधित अधिकारी यांच्याशी थेट संपर्क साधता येईल, अशी नवीन सुविधा उपलब्ध करून देण्यात आली आहे.या शिस्तबद्ध आणि पारदर्शक प्रणालींमुळे बाजार समितीतील कामकाज अधिक कार्यक्षम होईल आणि सर्व घटकांसाठी ‘अच्छे दिन’ येतील, असा विश्वास सचिव शरद जरे यांनी व्यक्त केला आहे.