-बाजार आवारत शेवगा शेंगांचा तुटवडा! दर गगनाला हिवाळ्यात सर्व भाजीपाल्याची दरात वाढ

नवी मुंबई : सहज उपलब्ध आणि स्वस्त म्हणून ओळखल्या जाणाऱ्या शेवग्याच्या शेंगा सध्या भाजीपाला बाजारात अक्षरशः गायब झाल्या आहेत. लहरी हवामान, परतीच्या पावसाचा फटका आणि थंडीचा वाढता जोर यामुळे उत्पादन घटल्याने मुंबई एपीएमसीत शेंगांचे दर गगनाला भिडले आहेत. स्वस्तात मिळणारी शेंग आता सर्वसामान्यांच्या ताटात ‘लक्झरी आयटम’ ठरत आहे.

एरव्ही ४०–५० रुपये किलोला मिळणाऱ्या शेंगांची आवक बुधवारी केवळ ८३ क्विंटल इतकीच नोंदली गेली. त्यामुळे घाऊक दर थेट १८० ते २८० रुपये किलो इतके झाले असून किरकोळ बाजारात तर प्रति शेंग ३०–३५ रुपये दर आकारला जात आहे. गेल्या महिन्यापर्यंत एका शेंगेला ५–१० रुपये मिळणारी ही भाजी अचानक एवढी महागल्याने सर्वसामान्य ग्राहक हैराण झाले आहेत.

पुणे, नाशिक, गुजरात, कर्नाटक व तामिळनाडू येथून नियमित येणाऱ्या मालाची आवकही अडखळली आहे. पावसामुळे मोठ्या प्रमाणात फुलगळती झाल्याने शेंगा काळवंडल्या, परिणामी विक्रीयोग्य मालात मोठी घट झाली आहे. शेतकऱ्यांच्या मते, नवीन हंगाम यायला अजून दीड महिना लागू शकतो, त्यामुळे दर आणखी वाढण्याची शक्यता आहे.

हिवाळा असल्यामुळे शेवगा शेंगांची मागणी मोठी असते. सूप, सांबार, रस्सा, तसेच पानांची भाजीही मोठ्या प्रमाणात केली जाते. क जीवनसत्व, अँटीऑक्सिडंट्स आणि फायबर यांच्या मुबलक प्रमाणामुळे रोगप्रतिकारक शक्ती वाढवण्यात शेंगा उपयुक्त असल्याने नागरिकांना याचे सेवन करण्यास प्राधान्य असते. मात्र वाढत्या दरांनी ‘आरोग्यदायी पर्याय’ आता हाताबाहेर जात आहे.

इतर भाज्यांचेही दर वाढले

थंडी वाढल्याने इतर भाज्यांच्या पुरवठ्यावरही परिणाम झाला असून मालाची गुणवत्ता आणि प्रमाण कमी झाल्यामुळे भाव वाढले आहेत. बुधवारी घाऊक बाजारातील किंमती पुढीलप्रमाणे —
• फ्लॉवर : २०–२६ रु./किलो
• कोबी : १४–१८ रु./किलो
• गवार : ८०–१२० रु./किलो
• फरसबी : ३६–४४ रु./किलो
• तोंडली : ५६–६० रु./किलो
• वालवड : ६०–७० रु./किलो
• वांगी : ५०–६० रु./किलो
• भेंडी : ७०–७६ रु./किलो
• टोमॅटो : ३६–४२ रु./किलो (किरकोळात २०–३०% वाढ)

व्यापाऱ्यांच्या मते, पुढील काही दिवस थंडीचा जोर कायम राहिला तर भाजीपाला महागाई आणखी वाढण्याची शक्यता आहे.

शेवगा महागला असला तरी मटारची आवक वाढल्याने त्याचे दर उतरले आहेत. बुधवारी एपीएमसीत १४६३ क्विंटल मटार आला. गेल्या महिन्यात ११०–१५० रुपये किलो असलेले मटार आता ६०–८० रुपये किलो दराने मिळत आहे. राज्य आणि परराज्यातून वाढलेल्या आवकेमुळे ग्राहकांना दिलासा मिळत आहे.

“सध्या बाजारात शेवग्याच्या शेंगा दुर्मिळ झाल्या आहेत. आवक कमी असल्याने दर गगनाला भिडले. अनेक किरकोळ व्यापाऱ्यांनी शेंगा खरेदीच केल्या नाहीत. नवीन हंगामाला एक ते दीड महिना लागेल, तेव्हा दर कमी होऊ शकतात. इतर भाज्यांचेही दर वाढल्याने मालाला अपेक्षित उठाव मिळाला नाही.”
— सुनील गुप्ता , घाऊक भाजीपाला व्यापारी, मुंबई एपीएमसी