-रसाळ यांच्या निवृत्तीनंतर नवी लढत! पणन संचालकपदी त्रिसूत्री स्पर्धा तापली”

-कदम, खंडागळे आणि गिरी या तिन्ही अधिकाऱ्यांची वैशिष्ट्ये, अनुभव आणि वाद–तक्रारींचा इतिहास पाहता, सरकार कोणाची निवड करते याकडे सर्वांचे लक्ष.

पुणे : राज्याचे पणन संचालक विकास रसाळ यांच्या ३० नोव्हेंबर रोजी होणाऱ्या सेवानिवृत्तीने सहकार व पणन विभागात नव्या चर्चांना उधाण आलं आहे. रसाळ यांच्या जागी पुढील संचालक म्हणून कोणाची निवड होणार, याबाबत बाजार समिती क्षेत्रात चांगलीच चर्चा रंगली असून, या शर्यतीत तीन नावे सर्वाधिक चर्चेत आहेत—पणन मंडळाचे कार्यकारी संचालक संजय कदम, अप्पर निबंधक डॉ. पी. एल. खंडागळे आणि साखर संचालक यशवंत गिरी.
कदम यांचा कार्यकाळ पूर्ण – बदलीचे संकेत
संजय कदम हे अनुभवी आणि वरिष्ठ अधिकारी म्हणून ओळखले जातात. पणन मंडळाचे कार्यकारी संचालक म्हणून त्यांचा तीन वर्षांचा कार्यकाळ आता पूर्ण होत असून, ते बदलीस पात्र ठरत आहेत. त्यामुळे त्यांची नावीन्याने संचालक पदासाठी दावेदारी मजबूत मानली जाते.

खंडागळे : वाद, तक्रारी आणि ‘मुंबई APMC’तील अपयशी कार्यकाळाची छाया

डॉ. पी. एल. खंडागळे यांची नुकतीच मुंबई बाजार समितीच्या सचिवपदावरून बदली करण्यात आली. त्यांच्या कार्यकाळात वारंवार तक्रारी झाल्या, तसेच बाजार समितीमध्ये वाढलेल्या अनागोंदी कारभाराची जबाबदारी त्यांच्यावर टाकण्यात आली होती.
समितीच्या संचालक मंडळाच्या कार्यकाळ समाप्ती, न्यायालयीन वाद, तसेच महत्त्वाच्या सुनावण्यांच्या वेळी ते अनुपस्थित राहिल्याने सरकारलाच न्यायालयात बाब समजावून सांगताना अनेकदा अडचणी आल्या. त्यामुळे त्यांच्याबाबत सरकार आणि पणन खात्यात “उत्साह नसल्याची” चर्चा आहे.
याशिवाय बाजार समितीच्या कारभारावर नियंत्रण ठेवण्याऐवजी गोंधळ वाढू दिल्याचा आरोपही खंडागळे यांच्यावर आहे. परिणामी त्यांच्या कार्यकाळापूर्वीच त्यांची बदली करण्यात आली आणि त्यांच्याऐवजी शरद जरे यांना पदोन्नती देत जबाबदारी सोपवण्यात आल्याची नोंद अधिकाऱ्यांमध्ये केली जाते.

“मुंबई APMC सांभाळता आला नाही, तर संपूर्ण राज्यातील ३०७ बाजार समित्यांचा कारभार खंडगले कसा सांभाळणार?” अशा चर्चा खुल्या रीत्या होत आहेत.

यशवंत गिरी : साखर संचालक आणि पणन सहसंचालकाचा अनुभव

यशवंत गिरी सध्या साखर आयुक्तालयात संचालक म्हणून कार्यरत असून, त्यांनी पूर्वी पणन सहसंचालक म्हणून कामही पाहिले आहे. त्यांचा प्रशासनिक अनुभव व संघटनात्मक कौशल्य लक्षात घेता तेही या पदासाठी मजबूत दावेदार मानले जात आहेत.

सरकारची पुढील चाल ठरणार निर्णायक

पणन संचालकाचे पद हे सहकार–पणन विभागातील अत्यंत महत्त्वाचे आणि राज्यातील बाजार समित्यांवर देखरेख ठेवणारे सर्वोच्च पद असल्याने निवडीकडे सर्वांचेच लक्ष लागले आहे.कदम, खंडागळे आणि गिरी या तिन्ही अधिकाऱ्यांची वैशिष्ट्ये, अनुभव आणि वाद–तक्रारींचा इतिहास पाहता, सरकार कोणाची निवड करते याकडे सर्व बाजार घटकांचे लक्ष लागले आहे.