-एक क्लिक – एक घोटाळा!
1800 कोटींची सरकारी जमीन 300 कोटींना – ‘अमेडिया डील’मागचं गूढ अजून उलगडायचं आहे!

पुणे : ‘सारखं फुकट, सारखं माफ कसं चालेल?’ असा सवाल करणाऱ्या उपमुख्यमंत्री अजित पवारांनाच आता विरोधकांनी उलट प्रश्न केला आहे—“मग तुमच्या मुलाला फुकट जमीन कशी चालली?” कारण, अजित पवारांचे सुपुत्र पार्थ पवार यांच्या अमेडिया कंपनीला पुण्यातील कोरेगाव पार्कमधील तब्बल 40 एकर सरकारी जमीन अवघ्या 300 कोटींना मिळाल्याचा सनसनाटी आरोप आहे. या जमिनीची वास्तविक किंमत सुमारे 1800 कोटी रुपये असल्याचा दावा विरोधकांनी केला असून, या व्यवहारावर राज्यभरात राजकीय वादळ उसळले आहे.

फक्त 500 रुपयांवर 21 कोटींची स्टॅम्प ड्युटी माफ!

पार्थ पवारांच्या कंपनीला मिळालेल्या या जमिनीच्या व्यवहारात नियमांचा फज्जा उडाल्याचे स्पष्ट झाले आहे. एवढेच नव्हे, तर या व्यवहारासाठी लागणारी तब्बल 21 कोटींची स्टॅम्प ड्युटीही माफ करण्यात आली असून, फक्त 500 रुपयांच्या स्टॅम्पपेपरवर करार करण्यात आला. नियम मोडून-तोडून हा करार झाल्याने प्रशासन आणि सरकारवर प्रश्नचिन्ह उभे राहिले आहे.

महसूल मंत्र्यांचे हात वर, सरकार बचावात

या व्यवहाराबाबत विरोधकांनी सरकारला घेरले असता महसूल मंत्र्यांनी ‘माहिती नाही’ म्हणत हात वर केले. तर राष्ट्रवादी (अजित पवार गट) चे प्रदेशाध्यक्ष सुनिल तटकरे यांनीही ‘माहिती घेऊन बोलेन’ म्हणत मौन पत्करले. दरम्यान, विरोधकांनी “ईडी-सीबीआय झोपलेत का?” असा थेट सवाल करत व्यवहार रद्द करण्याची मागणी केली आहे.

मुख्यमंत्र्यांची एन्ट्री, चौकशी समिती स्थापन

वादाच्या पार्श्वभूमीवर मुख्यमंत्र्यांनी अखेर या प्रकरणात योग्य चौकशीचे आदेश दिल्याचे सांगितले जात आहे. महसूल विभागाच्या पातळीवर अतिरिक्त मुख्य सचिवांच्या अध्यक्षतेखाली चौकशी समिती स्थापन करण्यात आली असून, प्राथमिक चौकशीतच दोन अधिकारी—पुणे तहसीलदार सूर्यकांत येवले आणि दुय्यम उपनिबंधक रवींद्र तारु—यांना तत्काळ निलंबित करण्यात आले आहे.

‘शेतकऱ्यांना फुकट मागू नका’ म्हणणाऱ्या पवारांचा दुटप्पीपणा?

‘फुटक मागू नका, मेहनतीचं फळ घ्या,’ असं शेतकऱ्यांना आव्हान देणारे अजित पवार आता आपल्या मुलाला मिळालेल्या या ‘फुकट जमिनी’च्या आरोपांमुळे अडचणीत आले आहेत. विरोधकांनी त्यांच्यावर ‘दुटप्पा राजकारण’ केल्याचा आरोप करत राजीनाम्याची मागणी केली आहे.

पुणेतील ही जमीन मूळ महार वतनाची असून आता सरकारी ताब्यात आहे. या जमिनीचा व्यवहार पॅरामाऊंट इन्फ्रास्ट्रक्चर आणि अमेडिया कंपनी यांच्यात झाला आहे. प्रत्यक्षात खत गायकवाड आणि मूळ 274 मालकांकडून घेण्यात आलं. पार्थ पवारांच्या कंपनीत त्यांचे मामेभाऊ दिग्विजय पाटील हे भागीदार आहेत. या सगळ्या प्रकरणाने आता राज्यात अजित पवारांविरोधात राजकीय वादळ पेटले आहे.